政情：胡曉明力推香港關公文化
香港好多人拜關帝，但關公文化就似乎唔係咁盛行。香港山西商會尋日宣布下周將首次舉辦「香港關公節」，仲會喺下星期關公節期間喺遮打花園豎立廿呎高嘅關公銅像供市民參觀。搞手之一嘅十八鄉鄉事委員會主席梁福元話近年香港人好似好唔開心，希望藉住傳承關公忠義仁勇嘅文化，釋出大家互相尊重嘅訊息。
銅像先放中環 後豎立元朗
呢座銅像係以關公故鄉山西省運城市豎立嘅全球最高二百四十呎關公像為藍本而訂製嘅。山西商會會長胡曉明都係關公嘅擁躉，同樣落力推動活動，屋企同公司更有擺放關公像，但就冇裝香。佢話活動結束後，銅像將豎立喺梁福元旗下嘅元朗大棠荔枝山莊，屆時將係全港最高關公像。點解咁益梁福元？胡曉明笑稱唔係益佢，係要感謝佢至啱喎。
梁福元就話早前去台灣睇櫻花，順便去日月潭睇關帝廟，覺得好宏偉，又話台灣嘅關公文化濃厚，所以佢特登撥出私人土地安置關公銅像，希望打造成關公精神嘅教育基地。為咗持續推動關公文化，尋日同時宣布成立「香港關公文化研究會」，由山西商會榮譽顧問王國強出任創會會長。