政情：轟單車政策「不友善」 何啟明呻中伏
立法會尋日討論冇法律約束力嘅「制訂單車友善政策」議員議案，多名議員就呻喺香港踩單車嘅苦況。工聯會嘅何啟明自爆，當選立法會議員之後向家中嘅財務委員會、即佢太太申請撥款購買單車，打算由旺角踩到金鐘嘅立法會，點知「買咗先知中伏」，因為佢發現添馬公園係唔准踩單車，而尖沙咀至中環嘅小輪航線亦唔准單車上船，「拆轆都唔畀」。結果佢都係要每日搭港鐵返立法會。
何啟明喺會上呻「中伏」嘅經歷，仲話如果政府依舊將單車視作休閒工具，其他部門同交通工具營運商都好難配合推行單車友善政策。
譚文豪鬧政策不知所謂
其實另一議員譚文豪亦同單車有淵源。佢話自細就識踩單車，而佢第一架單車就係住喺安置區時，爸爸喺垃圾房執返嚟嘅。後來佢喺東涌住，以為新市鎮踩單車好容易，但發現根本唔係咁，批評當局嘅單車政策「不知所謂」，仲話呢個亦係佢後來從政嘅其中一個原因。