政情：不滿hea做召集人民主派發動「倒涂」
昔日叫「飯盒會」嘅民主派溝通平台，自今屆立法會起易名為「民主派會議」，但目的都係一如以往，就最新形勢交換意見，同埋就唔同議題討論民主派立場。今屆開始時，因為唔少民主派議員都係議會新丁，佢哋最後推舉咗最資深嘅涂謹申（阿涂）做民主派會議召集人。本立法年度即將完結，「倒涂」行動亦展開，有民主派議員就不滿阿涂主持會議不力，又無實質作為，要求換人。
過去嘅飯盒會，民主派各個政黨都會畀面派員出席，而會議上都會有啲成果，例如成功討論到民主派立場。不過，依家嘅民主派會議就成為咗各自表述嘅平台，開完好似無開咁。有民主派議員就大鬧，召集人阿涂次次都係踢一踢、郁一郁，好似民主派對七一酒會嘅立場、協助被政府司法覆核議員等重要議題，唔係有人提醒，都唔會拎上民主派會議平台討論。
會議成效不彰 冇人到場
唔知係唔係會議成效不彰，會議亦由過去每個政黨都派議員代表出席，變成依家只有議員助理去開，聽完阿涂嘅報告事項，就好快收檔，完全達唔到共商對策嘅效果。
有人就歸咎於阿涂無牙力，唔識得主持會議，更加有人指阿涂辦事能力一向好高，質疑佢其實係無心裝載。但亦都有人為阿涂辯護，話唔少自決派議員好似朱凱廸同羅冠聰等，每次一有結論就強調民主派會議只係溝通平台，先令阿涂難以做到共識。
有人倡回復各黨輪調制
據了解，有議員私下討論回復各黨每年都會輪流派人做召集人嘅習慣，即由公民黨（公文袋）、民主黨（白鴿黨）、專業議政、自決派同埋獨立議員分成四組，每組人選各做一年。而阿涂做埋今年就算數，希望可以「換人換制度」，下一個會期有更好嘅開局。
唔知阿涂係咪已感受到議員有換人之意，佢尋日就鮮有透過助理提醒議員今日記得開飯盒會，更加叮嚀每個政黨必須要派議員代表出席。
其實阿涂從政多年一直無參與白鴿黨核心或領導，亦無處理黨務，向來被質疑只係自己顧自己，如今被指主持民主派會議不力都係意料之內。另一方面民主派光譜近年愈嚟愈大，意見分歧亦無可厚非，對阿涂嚟講可能都係非戰之罪。