中環出更：立會旅業足球對陣 先打口水戰
立法會足球隊聽日會同香港旅遊界足球體育會比賽，但未比賽就先上演場前哨戰喎。
話說日前立法會足球隊隊長何俊賢（高佬賢）同旅遊界議員姚思榮喺立法會走廊上相遇。高佬賢話足球隊自二月之後就一直冇練過波，因為要喺立法會內打仗，睇嚟佢哋到時都係打天才波o架嘞！佢仲話立法會足球隊比較蝕底，因為「知己知彼，百戰百勝」，對手早就對議員嘅資料掌握得一清二楚，相反佢就唔知道對手表現。姚思榮就大晒業界將會派出平均三十至四十歲嘅代表，而且佢哋更係踢開波嘅添，又指立法會足球隊次次都靠外援！好明顯佢對業界嘅球隊睇高一線喇！
聽到呢番話，高佬賢都大嘆今次年齡上攞唔到優勢，而陣中嘅外援猛將、前足球先生丘建威早前受傷，上陣成疑。睇嚟立法會足球隊今次有危機喎。
卓妮