中環出更：舊屋清簷篷CY卸任後搬返去？
政府換屆在即，特首官邸香港禮賓府亦將易主。現任特首梁振英（CY）將於六月底前搬離禮賓府，卓妮發現其位於山頂貝璐道裕熙園、曾捲入僭建風波嘅大宅，近日正進行清潔簷篷工程，似為CY回歸舊居作準備。候任特首辦公室回應稱，禮賓府需進行維修翻新工程，候任特首林鄭月娥預計喺八月下旬遷入禮賓府。
除咗首任特首董建華堅持續住私人住所外，第二任特首曾蔭權爵士及現任特首CY均遷入禮賓府。其中曾蔭權喺二○○五年搬入之前，便豪花近一千五百萬元公帑進行裝修，包括涉款三十萬元嘅錦鯉池；CY喺五年前進駐之前，亦花九百九十五萬公帑維修。
工人似無佩戴安全設備
特首辦回覆查詢時確認，CY將於六月三十日前搬離禮賓府，惟未有交代佢之後嘅住處。但本報發現CY嘅山頂大宅現正進行翻新工程，似為遷回舊居做準備。就記者上周所見，有兩名工人正在清潔大宅嘅玻璃簷篷，其中有工人似乎未有佩戴安全設備，經記者提醒後即急急沿梯返回地面。據了解，CY近五年來亦不時返回舊居，故從外望向單位，亦見到桌椅等家具齊備，但大宅游泳池仍未放水。
至於林鄭月娥幾時遷入禮賓府？候任特首辦公室發言人回覆稱，候任特首計劃喺八月下旬遷入禮賓府。發言人指出，根據建築署同機電工程署嘅專業評估，禮賓府需要進行維修翻新工程，有關工程將喺現任特首遷出後進行，工程細節及所需費用有待確定。
另外，為前行政長官提供辦公室、行政支援、汽車連司機服務、禮遇及相關安排嘅前特首辦，未有回應就CY稍後離任，會否為其添置辦公室及增聘人手。管轄前特首辦嘅行政署回覆，指過去五個年度，前特首辦員工數目維持七人，但二○一六／一七年度營運開支則達六百四十三萬元，按年增幅約一成。
卓妮