政情：陳淑莊買衫行四轉先扑槌
女性係天生購物狂？其實好多時女性喺購物時都會比較精打細算，考慮周詳之後先會做決定。日前喺一個環保活動上見到立法會議員陳淑莊（Tanya），眾所周知，佢平日出席立法會會議都經過悉心打扮，佢仲透露以前買件衫時試過往返同一間舖頭四次，去到第四次先決定買。
Tanya解釋，第一次喺店舖睇啱件衫時，會即場試上身，但唔會即時決定買，等自己離開咗店舖後，睇吓仲會唔會對件衫心掛掛先再決定。而第二次就係知道自己掛住件衫，所以就再返去店舖；去到第三次，就係考慮啲實用嘅條件，例如價錢、款式咁，直到第四次，就會諗自己有冇其他衫褲可以配襯到，然後就扑槌買。
開會太忙 轉戰網購
以前就話有時間可以閒逛啫，但重返議會後，幾乎日日都要開會，仲邊會有咁多時間行街買衫呢？Tanya就話依家日忙夜忙，冇時間行街買衫，反而轉戰網購，覺得咁樣仲方便。佢仲話就算依家出去行街，自己會覺得麻煩咗啲店員，就算最後都係試唔啱，亦會買吓其他嘢幫襯吓。佢透露，上次就係因為試咗衫成半個鐘，所以最後反而買咗條頸鏈。