政情：郭偉強趁打風返屋企湊仔

每次打風時，岸邊總有唔少人去觀浪追風。前日香港掛今年首個八號風球，唔少打工仔都有得提早收工，連立法會議員郭偉強亦唔例外，佢就自爆年輕時會想趁打風去海邊感受，但依家反而會把握機會返屋企湊仔。

郭偉強話香港高樓大廈林立，阻擋咗市區唔少風勢，如果想喺打風期間感受風力，就一定要去海邊先得。其後佢就自爆，年少時唔驚死，曾經喺打風時提出去海邊追風嘅要求，但阿媽就唔批准，更換來連聲責罵，所以追風呢個行為就一直無實現過囉！

至於今次打風有得提早幾小時收工，佢話唔會好似年輕人咁，趁機相約朋友唱K同睇戲，反而會把握機會陪多啲囝囝。至於追風呢個念頭呢？佢就話依家有仔有老婆，唔再做高危活動喇，而且佢都知道追風好危險，所以都唔建議大家去追喇！