政情：梁天琦：本土派冇市場「去晒坐監」
由台獨人士籌組嘅「台灣國會關注香港民主連線」（台港連線）日前成立，香港立法會議員、香港眾志主席羅冠聰、該黨秘書長黃之鋒及另一名立法會議員朱凱廸等自決派人士亦赴台撐場，被質疑「港獨勾結台獨」。不過，曾經參選立法會選舉更贏得六萬幾票嘅本土民主前線發言人梁天琦就大潑港獨冷水，直言本土派「成班人都去晒坐監」，認為本土派難再派人重奪議席。睇嚟梁天琦已經認清事實，本土派冇市場。
好難派人再重奪議席
梁天琦繼立法會新界東補選後，亦有報名參選上年嘅立法會選舉，但當時被選舉主任取消資格而改為「Plan B」青年新政梁頌恆助選。雖然選舉時全力支持Plan B，但喺梁頌恆與同屬青年新政嘅游蕙禎因宣誓辱華風波及被取消議員資格後期間，梁天琦一直潛水而被謔為「西瓜琦」，其後佢又突然蒲頭，並喺Facebook上自稱「無能」，而接受多個訪問時更先後表明「驚坐監」同自嘲「好廢」，早已為退出港獨議題做準備。
喺自決派議員赴台為「台港連線」撐場之際，梁天琦就喺英國為劍橋大學香港及中國事務會演講。過去曾同民主派競逐立法會議席嘅佢，竟然提倡本土派與民主派合作，以確保宣誓風波所引致嘅兩個懸空議席能夠保住，呢番言論確係難以相信出自梁天琦把口。佢仲講出一個對本土派非常殘酷嘅事實，就係指現時政治現實中，本土派好難再派人重奪議席，所以鼓勵本土派同民主派合作，至少就立法會補選進行初選同辯論，更話會有利保住議席，亦係對香港民主運動最好嘅方法喎。
有現場觀眾聽後都有感梁天琦立場已同當日參選唔同，梁天琦就坦言本土派「成班人都去晒坐監」，已經冇本錢再內鬥，而佢只希望為香港而坐監嘅年輕人，佢哋嘅付出冇白費。佢更解釋，當日參加新界東補選時任期只有幾個月，而且當時出席選舉論壇時大家都冇互相攻伐，只係各自陳述政治理念啫！
除咗梁天琦為港獨潑冷水，迫令本土派認清事實之外，特首梁振英尋日出席行政會議前都大談港獨。佢以台獨為例，指出台獨有前奏同變調，所以對於有人提出唔同程度嘅自決、分離，甚至港獨都唔能夠掉以輕心，更要防微杜漸，警惕任何漸進式將香港分裂嘅主張。