中環出更：三方案簡化選票設計 政黨有保留
依家立法會選舉嘅選票設計，候選人可於選票上印上個人照片、其所屬政黨名稱及標誌等，外界一直認為此舉有助選民辨認心儀嘅候選人，但隨着議席增加，地方選區嘅候選人名單數目於最近數屆立法會選舉有逐漸增多趨勢，政府向立法會提交文件，探討將地方選區選票設計簡化，合共提出三個方案，方案一係選票上刪減候選人照片，方案二係選票上刪減候選人嘅政黨名稱及標誌，方案三係同時刪除候選人照片及照片外其他詳情，只保留候選人姓名及其獲編配號碼。
民主黨批評本末倒置
雖然政府強調，三個方案均為初稿，供大家表達意見，不過，立法會多個主要黨派已迅速回應並表明有保留，其中民主黨胡志偉批評依家研究嘅方案係本末倒置，包括為咗選票嘅大細等原因作出修改，佢強調應該喺選票上提供足夠資料，表明反對有關建議。
建制派方面，工聯會黃國健話，對於加入政圈較短時間嘅候選人來說，如果唔印照片，又冇所屬政黨嘅名稱同資料，政府建議探討嘅內容係唔理想；民建聯周浩鼎亦質疑，究竟有冇必要刪走相片，政黨資料等重要識別內容，佢認為今次探討嘅內容茲事體大，希望小心研究再決定。
卓妮