中環出更：中西薈萃孫少文撐港非文化沙漠
香港經常被嘲為文化沙漠，港人只係搵錢至上，空談文化修養。不過，饒宗頤學術館之友主席、藝術收藏家孫少文就唔認同，更話香港有唔少藝術大師，而且香港作為中西文化交匯地方，文化藝術自然唔會差喎。
雖然前日橫風橫雨，但無阻一班藝術愛好者出席活動，逾百名書法家配合交響樂團嘅樂韻同場獻技，體驗出中西藝術合璧嘅成果。孫少文話書法能夠體驗人嘅文化涵養，但佢只識欣賞，而唔識得寫，但依家都有學習書法嘅計劃。
中國書協香港分會主席施子清寫得一手好字，但其子、菁英會創會兼榮譽主席施榮忻（Jaime）就大爆四兄弟手字都好一般，更透露連自己個名都未寫好添！唔知同父親從來無逼佢學寫字有無關係呢？
施榮忻兩女寫一手靚字
不過，佢就懷疑書法有隔代遺傳，事關兩個囡囡無上過書法班，爺爺亦無教導過書法，但兩個囡囡仍能夠寫出一手靚字。Jaime更話大女會用上顏色筆同公仔去寫出藝術字，大讚可以用落廣告度添，而佢上年父親節亦收到囡囡親手寫嘅賀卡！
立法會議員梁志祥每年喺農曆新年前都會落區為街坊寫揮春，所以手字都算過得去。佢就認為現今社會習慣用電腦同手機，所以愈嚟愈少人會重視字體端莊問題，而另一位議員吳永嘉就形容自己手字「好肉酸」，但寫英文就會好少少，佢更曾經有一排特登用墨水筆寫字，但最終都係放棄咗。不過，佢放棄並非因為寫極唔靚，而係嫌清洗墨水筆工序繁複喎。真係估佢唔到喇！
卓妮