港府以民政事務局慶典統籌辦公室名義分批向社會各界人士發出電郵，指本月三十日至下月一日舉行多項活動，要求獲邀人士填寫「嘉賓身分確認登記表格」（登記表格），提供個人資料及彩色近照，據悉一批非建制派議員已收到登記表格，限期為尋日回覆並提供所需資料。
不過登記表格非人人都收到，最少五名非建制派議員至今無收到有關登記表格，包括社民連「長毛」梁國雄、本土自決派四名議員朱凱廸、羅冠聰、姚松炎及劉小麗；即使係收到登記表格的主流泛民議員，亦正在「腦交戰」應否出席官方七一活動。
據了解，除咗梁國雄、羅冠聰等五人，大部分非建制派議員都有收到登記表格，包括捲入倒掛國旗及區旗案嘅熱血公民鄭松泰，然而即使收到登記表格，議員對於應否出席官方七一活動就仍然十五十六。
其中民主黨主席胡志偉確認收到登記表格，但暫不回覆並提供所需資料，留待今晚黨團會議作出討論；公民黨則稱按照過去經驗，預料該黨會有代表出席有關活動，一切仍有待黨內討論決定。
有泛民議員私下指今次感到左右為難，未能及早敲定應否赴會官方七一活動，與登記表格沒有列明具體活動嘅數目、時間同地點有關。
不過，亦有個別非建制派議員鐵定回覆當局唔會出席活動，據知最少有鄭松泰同埋人民力量陳志全兩人。
政府發言人回覆指，唔評論個別人士有否獲邀出席個別活動，重申政府於擬備嘉賓名單時會考慮活動性質、場地安排及嘉賓組合等不同因素。