政情：張國鈞為好友 「忘我」派波飛
下月將有四支英超球隊訪港獻技，包括利物浦、水晶宮、李斯特城同西布朗，逾五萬張門票早已火速售罄。身為足球總會上訴委員會成員嘅立法會議員張國鈞（Horace）透露，自己能夠內部認購賽事波飛，兩個比賽日各有十二張限額，所以身邊唔少好友都向佢「求票」，最終佢自費購入廿四張門票後全數轉贈朋友，連自己都無波飛入場睇波！
Horace笑稱，當時「口輕輕」對朋友作出承諾，結果搞到自己都冇門票入場，不過始終友情係無價嘅。此外，Horace又爆料指，另一名立法會議員陸頌雄正為未有今次賽事嘅門票而惆悵。
感嘆南華自降甲組
作為足球迷嘅Horace，對於擁有百年歷史嘅南華足球隊來季唔參加港超聯自降甲組嘅消息，感到可惜。佢透露，當晚聽到呢個消息時，剛好係同由多名前港隊成員組成嘅南華元老隊比賽，佢認為，港人對南華始終有一種情意結喎。