政情：施榮懷幫襯平民理髮店 一試難忘
打理三千煩惱絲嘅學問大，有人鍾意幫襯高級髮型屋或指定髮型師，洗剪恤盛惠過千蚊，似乎咁樣品質先至有保證。中華廠商聯合會永遠名譽會長施榮懷（Irons）以前都係咁，剪一次髮七、八百蚊，不過半年前佢開始幫襯連鎖嘅單剪髮專門店，只需六十蚊，五、六分鐘就搞掂，認真係平靚正。
Irons話，男人嘅髮型其實好簡單，無非係長咗然後剪短。大約半年前，佢開始去幫襯只提供剪髮服務嘅飛髮店，唔洗唔恤，又快又平，師傅又剪得啱佢心水，所以勁開心。佢其後更自爆讀大學時，試過留及肩長髮，仲電到鬈晒添！立法會議員吳永嘉聽到Irons平靚正嘅剪髮經驗，都心思思想試，佢依家飛髮使費都唔算貴，但都要盛惠一百二十元！