政情：蔣麗芸 梁美芬滿腦鼠橋

蔣又提貓隊 梁倡「區區有鼠王」

近期阿Ann對鼠患問題非常關心，除咗多次喺立法會上表達訓練流浪貓捉老鼠嘅建議外，據報佢上月曾同房屋署署長應耀康商討鼠患問題，而喺尋日更再接再厲，阿Ann喺立法會大會當面向食物及衞生局局長高永文提出口頭質詢跟進。

阿Ann指出，深水埗區同旺角區屬於鼠患最嚴重地區，建議政府參考外國例子訓練流浪貓捕鼠，更提出於鼠患黑點先行組織社區貓隻滅鼠隊。佢又直指依家老鼠「晚晚開Party（派對）」，直斥當局放置老鼠藥、老鼠籠等做法已經無效！

緊接發言嘅建制同泛民議員，似乎一講起防治鼠患問題就對「鼠王芬」念念不忘，首先新民黨議員葉劉淑儀關注，政府係咪有真正嘅滅鼠專家，如果冇專家就應該請「鼠王芬妹妹」喺廣州帶專家來港；有泛民議員其後亦接力，指出香港鼠輩橫行、鼠禍為患，若政府要諮詢持份者，究竟包唔包括「鼠王芬」。

被多次點名提及其稱號嘅梁美芬，發言時先自嘲因防治鼠患而被冠上花名，又表明希望「十八區都有鼠王」，等區議員同立法會議員一齊跟進鼠患問題。佢其後繼續發炮，批評政府太官僚，使好多錢但欠實效，又稱依家多區嘅鐵路工程將老鼠「震晒出嚟」，連中產區都需要自組滅鼠隊，形容有關情況係災難性，再次重提當局應考慮邀請同內地專家合作。

對於多名議員對防治鼠患嘅意見，包括訓練流浪貓捉老鼠，高永文回應時話貓捉老鼠係常識，而當局會組織不同持份者，就培養社區貓滅鼠論證其可行性，亦會參考國際上聲稱成功嘅例子作參考資料。

港府強調用回基本方法

不過言猶在耳，高永文補充喺公共街市飼養貓隻有一定風險，可能會傳播人畜共通病，亦有機會污染環境而衍生食安問題，同時會影響現時嘅滅鼠策略。他再三強調，治鼠要從基本着手，消除老鼠食、住、行三個生存條件。估唔到一批議員對治理鼠患都咁有心得，唔知高永文又有冇長知識嘅感覺呢？