中環出更：泛民反對大會讓路 梁君彥急褪軚
立法會尚有一個多月就會休會放暑假，立法會財務委員會積壓大批議程仍未通過，立法會主席梁君彥於上周五拋磚引玉，建議將平時預留畀大會續會嘅逢周四會議時間讓路予財委會開會，但隨住廿六名泛民議員本周一發表聯合聲明表明反對大會讓路予財委會，梁君彥尋日疑褪軚轉口風，以大會最近仲有好多議程為由，表明大會讓路畀財委會呢個計劃唔急住推行。佢尋晚喺大會會議結束後補充，由於呢兩個星期已排滿議程，唔可能作讓路，暗示大會讓路財委會一幕唔會短期內成事。
陳健波首次明確「開價」
一直對於大會讓路財委會心存希望嘅財委會主席陳健波（波哥），再次促請主席開路，給予更多時間予財委會審議積壓撥款申請，佢首次明確「開價」，希望喺唔影響大會嘅情況下，主席可以特事特辦，於本月底嘅兩個周四撥出合共廿四小時會議時間予財委會開會。
波哥其後又率先表態，稱已經準備好加會至八月，但佢承認，立法會七月下旬將有一批議員赴以色列考察，加上唔少議員預料會到外地旅行，相信能夠加會嘅時間有限。波哥再三強調，建制派普遍支持大會讓路嘅建議，認為主席應該尊重大多數人嘅意見。
卓妮