中環出更：陳鑑光勁減磅劍指喜馬拉雅山
仁愛堂早前喺淺水灣舉行米芝蓮三星名廚世紀慈善晚宴，好多城中名人聞香而來，包括仁愛堂總理陳鑑光（Charles）及太太陳鄭玉而。美食當前，點知Charles話淺嘗即止，事關佢用咗個幾月勁減廿三磅，信心大增，決定再減多十八磅，然後就會去學攀石，目標係去喜馬拉雅山挑戰登峰。
Charles原本體重直逼二百磅關口，早前佢馬不停蹄去咗西藏、緬甸及日本沖繩等地，返到香港明顯瘦咗，於是乘勝追擊勤做運動兼食少啲，結果減重效果顯著，成個人Fit晒。
梁經綸回歸經典菜式
Charles愈減愈有勁，話要目標減至一百五十五磅，咁就可以學攀石喇！
講番晚宴，出席嘅仲有仁愛堂主席李愛平、副主席羅台秦、前主席鄧錦雄等人。當晚主理嘅星級名廚係以創意分子料理聞名嘅「廚魔」梁經綸，同埋「白松露之王」Umberto Bombana。近年分子料理嘅熱潮似乎有所減退，廚魔話今次佢設計一啲回歸傳統嘅經典菜式，更加着重食材質素同埋令食客食得舒服。遲啲佢仲會同拍檔喺青衣開茶餐廳，務求令普羅大眾都食到佢嘅創意菜式。
身兼香港道教聯合會副主席嘅鄧錦雄啱啱去完武當山出席一個道教論壇返嚟。太極係道教嘅精髓，最近有綜合格鬥狂人打敗太極高手後出言挑釁，引起武林共憤，鄧錦雄就話，道家文化講求修行、品德及養生，如果做人冇品格，社會就不得安寧喇！
卓妮