政情:建制想過三關 自決派問到底

距離立法會暑假休會只餘下一個多月時間,立法會財務委員會仍積壓大批撥款申請仍未審批,部分更有死線時限,財委會主席陳健波(波哥)對此已急到好似熱鍋上嘅螞蟻咁,打晒開口牌希望立法會主席梁君彥讓出餘下每逢周四開大會嘅時間,等財委會隨時加會作最後衝刺,建制派陣營亦擬定作戰計劃,據報已鎖定三個重大撥款項目務求於休會前通過,分別係前不久先獲工務小組「開綠燈」涉及三百一十九億元嘅啟德體育園項目,涉及沙中線前期工程追加約八億五千萬元,以及二億八千萬元嘅東涌第五十四區公屋發展計劃,據知三者之中以啟德體育園項目遇到阻力最大,自決派議員表明審議有關項目會繼續盡責提問到底。

財委會議程「大塞車」,政府高層早前已經開口呼籲泛民議員高抬貴手,把握每一分每一秒通過最多撥款項目,但話雖如此,始終時間緊迫,建制派已做好兩手準備,首先陳健波尋日宣布於本月十七日及廿三日各加開兩節會議,令本月合共有廿小時審議仍未審批嘅項目;另一方面,建制陣營已鎖定於休會前務必要通過東涌公屋項目、沙中線前期工程追加撥款,以及啟德體育園項目撥款,如果進展順利,更可望於新政府七月上任後,極速批核教育新資源首批約三十六億元撥款。

不過建制陣營嘅如意算盤係咪打得響受到多個唔確定因素影響,當中尤以泛民陣營取態至為關鍵,首先佢哋對於餘下每逢周四大會開會時間,讓路予財委會開會有好大反彈,泛民廿六名議員尋日特別發表聯合聲明,開宗明義反對削減大會開會時間,又批評咁嘅安排係配合行政機關,削弱立法會嘅議事職能,直指喺建制派護航下,財委會同轄下工務小組、人事編制兩個小組已可不停加開會議,根本唔需要削減大會時間。

啟德體育園遇阻力最大

對於建制陣營疑鎖定三大項目撥款,包括啟德體育園項目務求暑假休會前通過,自決派議員、香港眾志羅冠聰表明,日後審議啟德體育園等本身具有極大爭議嘅項目時,依然會盡議員責任問問題;另一名自決派議員朱凱廸則透露,自己對於沙中線前期工程追加撥款唔會有太多追問,但佢表明唔滿意政府以霸王硬上弓嘅方式,完全唔容許有議員作任何修改。佢又事先張揚,會嘗試就啟德體育園營運模式提出修訂,希望政府有妥善回應。由此觀之,啟德體育園項目勢必成為建制、泛民於財委會攻防戰嘅主戰場。

至於波哥打晒開口牌希望大會讓出部分會議時間予財委會一事,梁君彥透過發言人回覆指,建議大會開會時只處理一項無立法效力嘅議員議案嘅可行性,以便騰出周四部分時間予財委會同轄下兩個小組審議積壓嘅議程,發言人強調呢個只係初步建議,會否落實仲要聽埋議員意見,先可以作整體考慮喎。

第一手消息請下載on.cc東網iPhone/iPad/Android/Windows Phone Apps