政情：韋志成市區種沉香 被轟堅離地
香港近年為種植合適嘅樹、樹木保育等方面絞盡腦汁，市建局行政總監韋志成尋日忽發奇想提出喺香港市區種植沉香樹，又自爆已同漁農自然護理署傾過點樣長遠喺香港種植沉香樹，稱打算做一份樹木登記冊，將市建局種嘅每棵沉香樹登記，好好管理。不過，言猶在耳，有「樹博士」之稱嘅詹志勇批評，韋志成呢個建議不切實際，根本唔知全香港仲有好多沉香樹，浪費資源亂搞保育。
眾所周知，沉香以香味聞名於世，近年亦屢有位於郊區的沉香樹被不法之徒睇中，甚至被大規模砍伐，如果韋志成真係成功爭取於市區種滿沉香樹，偷伐沉香嘅賊人隨時可以四出行動，到時就算有心想做好監察工作，似乎只係一廂情願，有關方面亦要有疲於奔命應對嘅心理準備嘞。
稱以種樹建構和諧社會
韋志成尋日於最新網誌以「市建融和植沉香」為主題，指香港嘅氣候及水土適合種植土沉香，而土沉香曾係香港郊野常見嘅樹種之一，但近年沉香木嘅需求不斷增加，非法砍伐土沉香嘅情況時而出現，佢認為，土沉香既為香港命名之樹，適逢今年係香港回歸二十周年，市建局計劃把沉香樹從郊區帶回市區。佢又稱，希望可以令市民多啲認識沉香樹同香港淵源，仲話沉香樹香味平和，「呢個正同現今香港需要兼容並包的氛圍、齊心建構和諧社會嘅思想如出一轍。
韋志成忽發奇想於市區種沉香樹嘅言論，不消一會就遭到多方質疑，其中人稱「樹博士」嘅港大地理學系講座教授詹志勇話，被砍伐嘅沉香樹係生長最少幾十年嘅老樹，本港郊區仲有好多年幼沉香樹，並唔係瀕危植物，而且漁護署每年都會種植大約一萬棵沉香樹，「每年種一萬棵即係唔珍貴，而且咁大量嘅樹點可能長期監察」，就此，佢批評市建局構思不切實際，「千祈唔好浪費資源」。
專家：需考慮環境觀賞價值
詹志勇續指市區土地有限，選擇種甚麼樹要睇環境功能同觀賞價值，但沉香樹嘅觀賞價值唔高，又唔遮蔭，比較適合種喺密林，假如種喺市區，高溫加上周圍有大量人造物料及建築物，「太陽喺夏天曬落去係會熱到得人驚，可以熱到六、七十度」，沉香樹會生長得唔健康變成「弱樹」，即使採集其種子再繁殖，亦只會生長出較弱嘅沉香樹。
唔知詹志勇苦口婆心分析市區種植沉香樹或面對嘅困局，韋志成會否聽入耳，停一停、諗一諗係咪堅持己見呢？