政情：大嘥鬼踩過界 公開插特朗普
全球暖化迫在眉睫，聯合國一百九十五個成員國喺前年底曾簽署《巴黎氣候協定》，希望可以阻止全球暖化嘅趨勢。但美國總統特朗普宣布，美國將退出協定，其決定令美國內外齊聲譴責，甚至連港府宣傳珍惜食物嘅吉祥物「大嘥鬼」亦狂插，更稱「真心嬲嬲豬」。
大嘥鬼尋日喺facebook發表名為「齊撐巴黎協議」貼文，批評氣候變化唔淨止係一個國家嘅事，作為世界公民好應該為地球負責。大嘥鬼又認為，若因為利益、政見唔同而背棄地球，實在令人失望。
貼文諷特競選口號
大嘥鬼在貼文內配以一張手持疑似特朗普頭髮嘅相片，更寫上「Make our planet great again（讓我們的地球再次偉大）」，諷刺特朗普在競選總統時嘅口號「Make America great again（讓美國再次偉大）」。
不過，由於按《基本法》香港無外交權，而且港府以往極少會譴責外國政府嘅施政，因此大嘥鬼今次插特朗普，好明顯踩過界囉！