對於一般男人嚟講，單純外在美已經夠吸引佢哋嘅目光，而最誘人嘅，莫過於具線條美嘅三圍。除此之外，仲有一處能夠打動男人心，就係一對修長美腿，好似南韓人氣模特兒殷彬咁，其白滑長腿魅力爆晒燈，令男人冧到暈。
出生於南韓首爾嘅殷彬，擁有標致嘅樣貌，加上高挑身材，一出場便成為焦點。佢仲有一個煞食優點，就係擁有一對修長美腿，憑住呢個先天優勢，2009年首次喺車展亮相時，引起全場哄動，事關佢穿着一條低胸高衩連身裙示人，將玲瓏浮凸嘅身材同長腿展露無遺，令一眾男士都忍唔住向佢行注目禮，而呢次處女演出如此成功，令佢打咗支強心針，增加自信。之後佢喺一個大型電玩展以Show Girl身份登場，雖然佢並未以性感造型示人，但憑住美腿嘅魅力，亦成為人氣極高嘅Show Girl之一。連番演出之後，殷彬嘅人氣直線飆升，工作亦接踵而嚟，對於一個新進模特兒嚟講，呢個成績絕對理想。可能有人會覺得奇怪，點解一位新人能夠喺短時間內獲得超高人氣呢？唔少人都認為原因係佢外形出眾，咁諗只係啱一半，因為單憑外在美係絕對唔會襟睇，最重要係加埋內在美，殷彬全身散發出一股女人味，令男人暈晒大浪，咁你話點會唔受歡迎吖。此外，畢業於首爾東國大學嘅佢，不但擁有高學歷，更精於彈鋼琴，可謂一位極具修養嘅美女，難怪令人一見傾心。
隨住發展愈嚟愈順利，人氣亦愈嚟愈高，2014年殷彬突然參加亞洲模特兒大賽，令人感到十分意外！點解會話意外呢？皆因參加呢類比賽嘅模特兒都係人氣唔高，藉住比賽嚟提升知名度，同時開拓發展空間。而殷彬喺模特兒界已工作咗5年，又獲得相當高人氣，真係冇乜需要參加比賽，而且喺比賽期間唔可以接Job，變相減少收入添。既然係咁，點解佢會參加比賽呢？殷彬表示雖然佢好早就已經接觸模特兒工作，並且以模特兒作為事業，但係佢一直有個心願，就係希望可以見識到更加大嘅世界，而透過比賽不但滿足到願望，仲可以知道自己有乜嘢不足嘅地方，從而作出改善，結果佢喺呢次比賽獲得最受網民歡迎獎，呢個獎項正好反映出佢幾咁受到歡迎。雖然佢透過呢次比賽，成功令人氣登上高峰，但佢仍希望未來喺模特兒界獲得更高嘅成就。
簡介：殷彬嘅迷人外形同女人味，足以令每個男士心動不已，加上一對美腿，叫人點可能唔鍾意呢？想了解佢多啲，梗係要睇佢嘅IG啦，仲有好多自拍靚相，一定能夠滿足大家嘅眼球。
網址：https://www.instagram.com/god_eunbin/
出生地：首爾
身 高：173cm
三 圍：34、24、34
撰文：魂