政情：陳兆陽端午後先收到龍舟門票
前日係一年一度嘅端午節，全港多個地區都有龍舟競渡賽事，其中沙田體育會就喺城門河畔舉行賽事。不過，主辦方沙田體育會似乎出現甩轆，寄門票時因為郵資不足，過咗端午啲門票先交到其中一個沙田區議員手上，搞到一大疊門票得物無所用。
差兩毫郵資而延遲派遞
沙田區議員陳兆陽尋日喺facebook上載一張信封照片，指依家先收到沙田體育會寄嚟嘅門票，仲以為今年該會無安排門票畀區議員。而由信封上嘅印章可見，郵件係因為差兩毫嘅郵資，而延遲派遞。陳兆陽話因為郵資不足佢要親自去郵局取件，去到先發現是一大疊門票。
沙田體育會接受查詢時指出，今年合共寄出逾千封有關郵件，暫時未收到其他人指郵件遲派或寄失，相信係個別情況。該會又強調每封郵件都有磅過，對於郵資不足不明所以，但該會為事件引起不便致歉。