中環出更：泛民做逃兵 體育園項目過關
政府之前話啟德體育園工程複雜，為咗補償投標者承擔嘅風險，建議向入圍但最後落選嘅投標公司，提供最多一億八千萬港元嘅提案誘因。泛民議員一聽到就已經起晒弶，炮轟政府浪費公帑，誓言要阻礙議案通過，點知有三名泛民議員做咗「逃兵」，最終喺一票之差下，通過咗體育園項目。有建制派議員質疑大力反對議案嘅民主派議員黃碧雲點解冇出席投票，喺否決後更有人大叫「黃碧雲喺邊？」
以一票之差順利通過
工務小組尋日表決議案，最後有十八票贊成、十七票反對、以一票之差順利通過，會上官員見到票數僅僅夠過都即刻鬆一口氣。睇番投票紀錄，民主黨（白鴿黨）黃碧雲同尹兆堅，以及資訊科技界議員莫乃光，三個人都做咗「逃兵」冇去投票，到底搞邊科？
尹兆堅話去咗幫居民
黃碧雲事後解釋，因身體不適未能出席會議，對此感到抱歉；黨友尹兆堅就解釋，話屯門紅樓嘅業主尋日突然圍上鐵絲網，所以要趕去協助居民同業主周旋喎！莫乃光事後就話對事件感到非常抱歉，但今次係自己遲到，唔想搵藉口解釋，之後會做好一啲，避免同樣情況再次發生。
卓妮