中環出更：麥美娟地獄廚神燜菠蘿苦過涼茶
多名立法會議員尋日同智障人士合作，組隊比賽煮嘢食。自認係唔識煮嘢嘅議員麥美娟（Alice）事先張揚，自己以往煮公仔麵都黐底，煲水都整到個煲黑晒，另一名議員郭家麒就唔識開着個爐，真係一邊睇，一邊替一班評判擔心！
勞福局局長蕭偉強喺活動上話，多謝議員願意走入熱廚房，唔知佢哋頂唔頂得住，但估計今次都有好多新手，唔知佢哋係天使廚神定地獄廚神，不過自己就唔敢批評嘞，因為仲要去立法會接受質詢，但就叫評判唔好吝嗇中肯評論，因為冇乜幾可可以當面批評立法會議員。之不過，蕭偉強未睇到議員煮嘢就已經早走嘞，唔通因為佢早已講明會退休，所以要離開熱廚房？
跟住班議員開始埋位，Alice話讀大學嗰陣住宿舍，曾經煲過一小煲綠豆沙，但係太甜，結果個個都要溝水食，可以分得晒畀全層食，仲有個同學覺得太甜，用薯片送綠豆沙添呀。佢今次同隊友煮茄汁燜菠蘿，佢煮之前已笑指自己今次贏梗，因為已經買通咗評判喎。其實都係講吓笑啫，其中一位評判係佢嘅好朋友，都係喺佢煮嗰陣幫咗兩下手，而且呢位評判亦唔止幫佢一個嘅。而各位評判試食嗰陣，仲話Alice碟餸苦過涼茶添！
郭家麒唔識開爐要評判幫
至於郭家麒同隊友就煮「菇菇高麗菜蛋燒」就真係遇到難題嘞，佢唔識開着個爐，用咗成五、六分鐘都開唔着，就算叫埋評判同工作人員幫手，但係撳嚟撳去都開唔着個爐！不過，佢同隊友嘅合作就唔錯，佢去處理個爐嘅時候，隊友就發定啲蛋等佢，但就係因為少咗咁多時間，所以後來有評判幫手煮。郭家麒話屋企用煤氣爐嘅，真係唔太識用電磁爐呀，加上佢一年先煮一次飯，所以喺煮食方面完全冇進步過。
喺比賽前，生得好高嘅議員林卓廷着圍裙就發現太細，連膠手套都好勉強先戴得上，佢話平日着加大碼喎。唔知咁樣有冇影響佢嘅表現呢？最終由議員田北辰嗰隊贏得美食金獎，而傷健合拍烹飪大獎就由郭家麒嗰隊奪得，但頒獎時有少少甩轆，兩個獎一度掉轉咗。
卓妮