政情：泛民譴責周浩鼎 鬥搶險鬧雙胞
特首梁振英涉嫌同UGL專責委員會前副主席周浩鼎「打龍通」嘅風波停不了！雖然周浩鼎已經敗走、辭任專委會委員，但泛民一早就表明，要向周浩鼎提出譴責動議。之不過，提出譴責動議嘅過程就一度因為公民黨（公文袋）對前黨員毛孟靜草擬嘅字眼持唔同意見而「鬧雙胞」，公文袋更屬意由黨友譚文豪出頭提出動議，最終要將兩份動議整合為一，先可以追殺周浩鼎。
睇番成個時序，毛孟靜上個禮拜已經率先向秘書處提交譴責動議，但據悉公文袋中人就擔心呢份草稿有啲字眼冇擺入裏面，會影響日後成立委員會調查呢次「打龍通」事件，所以就草擬多一份動議「補個底」交畀秘書處，又決定由唔係專委會委員嘅議員譚文豪出頭提出譴責動議。眼見譴責動議「鬧雙胞」秘書處就即刻聯絡毛孟靜同譚文豪了解情況，又指示佢哋星期三之前要將兩份動議整合好，否則可能趕唔切下個月七號攞上大會喎。
譚文豪回覆查詢嘅時候就話，毛孟靜同佢嘅辦事處尋日下晝都仲草擬緊份議案，希望趕及喺夜晚十二點前交畀秘書處。至於最後用邊個嘅名義提動議，譚文豪就話真係冇所謂，留番草擬完份議案先決定搵邊個簽名，佢淨係希望整合出一份最理想議案。而該黨黨魁楊岳橋亦回覆話，一定唔會「鬧雙胞」，提交議案前亦會尊重毛孟靜嘅意見，確保大家都同意動議內容。
建制屬意民記搵人頂替席位
另外，有傳建制派開始醞釀人選接替因為醜聞辭職嘅周浩鼎，並屬意由周浩鼎嘅黨友、本身都係律師嘅張國鈞加入專委會。本身亦係律師嘅建制派議員吳永嘉就話，各個建制派政黨都有代表入咗專委會委員，專委會內亦已經有建制派嘅獨立議員，考慮到民建聯（民記）唯一委員周浩鼎都已經辭職，相信由黨友張國鈞頂上會比較合適。
不過，楊岳橋表明唔贊成建制派搵人頂上，更形容如果搵張國鈞頂上係「衰一件就搵第二件」，根本就冇為事件認錯。至於泛民會唔會乘機爭取多一席，譚文豪就話要視乎民主派有冇人想加入專委會，但以建制派佔多嘅情況下，相信突圍成功嘅機會並唔高喎。