中環出更：飲熱華田小學雞？ 柯仔唔係咁睇
早前有網民指有九十後去見客食飯時叫熱華田，因而覺得對方小學雞，言論引起網民熱烈討論。立法會議員柯創盛（柯仔）就話，雖然阿華田看似屬於小朋友飲品，但唔能夠單以一個人鍾意飲乜嘢去判斷其為人，而佢嘅至愛就係凍檸茶，特別係做嘢做到谷氣，飲多杯先順到氣喎。
做嘢谷氣 要歎凍檸茶
自言鍾意幫襯茶餐廳嘅柯仔，對茶餐廳果然非常熱愛，因為佢將茶餐廳形容為「屋企」。佢又話阿華田同好立克都係健康飲品，只係涉及個人選擇，而佢間中都會飲，認為飲華田等於小學雞呢個話題，只係大家覺得有趣先多人討論啫！睇嚟佢都唔認同呢番言論。
雖然柯仔間中都會飲阿華田，但佢最愛嘅飲品實情係凍檸茶，佢仲話自己上咗癮，每日起碼飲一杯添！佢解釋，鍾情凍檸茶嗰種茶味，加埋檸檬味就更加爽喇，特別工作時做到谷氣，要飲多杯先順到氣喎！不過呢啲飲品始終多飲無益，柯仔都要有啲節制先得嘞！
卓妮