中環出更：青年夢想家分享奮鬥史
啲人成日話，做人冇夢想同條鹹魚冇分別，但係要實踐夢想又談何容易。青年夢想實踐家協會早前邀請咗幾位創業人士分享追夢歷程，一間藝術體操芭蕾舞學院校長吳頌蘭話，佢大學讀翻譯，頭幾年教藝術體操賺錢唔多，見大學同學個個升職、轉好工，好難受。而速度滾軸溜冰選手袁嘉曦就立志將速度滾軸溜冰發揚光大，雖然蝕住辦學，但邂逅咗太太，追夢都算有得着。
吳頌蘭十歲開始學藝術體操，畢業時都諗過做法庭傳譯，穩定又較有前途，但最終佢都選擇開藝術體操學校。開頭搵錢唔多，屋企人又唔係咁支持，但佢始終堅持夢想，堅持嘅秘訣係抄啲座右銘鼓勵自己喎！
辦學蝕本 袁嘉曦賺良緣
袁嘉曦就話，香港對非主流運動支援唔多，但佢好想推廣熱愛嘅速度滾軸溜冰，所以開咗一間學校，之不過十五年來都係蝕住做，每月盈餘唔多過一萬元。不過佢邂逅當年嚟學溜冰嘅太太，雖然公司依家只有佢同太太兩人，生活壓力大，但都會繼續做落去。
社企「樂在棋中」創辦人黃頌行育有兩女，因為見到依家嘅小朋友只沉迷「電子奶嘴」，即手機遊戲，所以決定由社工轉行設計桌上遊戲，希望小朋友可以透過簡易、有本土特色嘅遊戲遠離「電子奶嘴」。同場嘅香港兒童及青少年創意藝術發展聯會會長歐陽鳳盈就冇將跳舞夢想化為職業，而選擇行銷業，閒時就義教弱勢嘅少數族裔小朋友跳舞，佢話夢想唔一定要成為正職喎！
卓妮