今年係六四事件二十八周年，支聯會一如既往將舉行六四晚會，但近年多間大學及專上學院同支聯會已愈走愈遠，據知大專學界代表將連續第二年缺席六四晚會，支聯會一早已搵咗本地少年樂隊Boyz' Reborn創作新曲《自由之歌》，希望以另一種方式表達新一代對六四事件睇法。
支聯會同大專學界關係近年大不如前，首先去年四月，身為支聯會創會成員嘅專上學生聯會（學聯）退出支聯會，加上去年整個大專學界另起爐灶合辦六四活動，支聯會去年幾經辛苦搵來「大專政改關注組」和支聯會青年組成員發言，以代表新一代。
支聯會副主席蔡耀昌承認，今年冇聯絡各間大學嘅學生會出席六四晚會，又透露Boyz' Reborn於六四晚會當晚會上台表演，但具體流程仍在商討中，重申希望有新一代嘅聲音帶到出來。
資料顯示，Boyz' Reborn早於兩年半前，即一四年佔領行動時已有翻唱同佔領行動有關嘅歌曲，近年亦有創作有政治意味嘅歌曲，今次創作《自由之歌》，將表達六四事件薪火相傳嘅重要性，支聯會近日已將呢首歌上載至facebook，至今已有超過一萬人次瀏覽。
至於學界於六四當日嘅活動，據知目前已敲定時間細節嘅活動唔多，其中港大學生會計劃於六四當日下午舉行研討會，而由中大等四間大學學生會組成嘅學聯則暫時未有下文。