政情:梁栢賢扮小智 「全家PY圖」爆笑

醫管局行政總裁梁栢賢(PY)每年喺醫管局研討大會嘅致詞從無悶場,更係眾人最引頸以待嘅環節。今年PY大玩「低成本cosplay(服裝扮演)」化身寵物小精靈中嘅小智,向大家講解醫管局資訊科技最新發展,仲話希望呢啲科技可令人延年益壽,去到一百歲都可以同家人享福。PY更完美示範key圖(合成圖),將自己個樣key落全家福,變成「全家PY」,引來全場爆笑。

話要「進化」電腦系統

PY話醫管局正努力將病歷資料電腦化,現時所有醫管局官方資料涉二百八十TB嘅容量,而每一個TB,都相等於八百五十萬張紙張,即是一萬棵樹。隨住公立醫院服務增加,公院平均每分鐘接見六十三個病人,每秒有二十次涉及電子病歷系統嘅輸送。為咗減少出錯,醫管局要努力「進化」電腦系統,包括研發唔同手機應用程式方便病人查詢病歷或接收健康資訊。

佢又發揮低成本創意,將醫管局風褸同背囊穿上身cosplay小智走到街頭茶餐廳食菠蘿包,話希望將來可以研發到一啲健康資訊應用程式,令人隨時隨地都可以得到資料,例如食個菠蘿油有幾高脂,一查就睇到,如果可以更健康,一家人(好似全家PY咁)就可以全家都健康,共享天倫之樂啦!

第一手消息請下載on.cc東網iPhone/iPad/Android/Windows Phone Apps