政情：搞澳門版雷動戴耀廷又發夢
策動七十九日違法佔領行動嘅「佔領中環」發起人、香港大學法律系副教授戴耀廷又再發表「偉論」。繼佔中、去年立法會選舉嘅「雷動計劃」，以及針對二○一九年區議會選舉嘅「風雲計劃」後，佢就提出「雷動計劃」澳門版，話如澳門有八萬至九萬名選民支持雙普選，澳門立法會直選取得過半數嘅八席就並非冇可能，但條件係支持雙普選名單唔能夠多過八張。戴耀廷發完一個又一個夢，但搞佔中令香港社會撕裂，雷動計劃搞到一鑊粥，風雲計劃亦已冇人吼，唔通係因為香港夢碎，所以佢又發夢要踩過界？
倡藉立會選舉作「公投」
澳門立法會議員數目共有三十三人，當中十四個議席係由直接選舉產生、間接選舉產生嘅就有十二個、另有七人係由澳門特首委任。澳門新一屆立法會選舉喺九月舉行，戴耀廷尋日喺本港報章撰文話，澳門《基本法》冇規定實行雙普選，但澳門市民可以透過立法會選舉「變相公投」，只要支持雙普選嘅名單加起嚟得票達五成以上，就表示市民支持雙普選。
戴耀廷又以上屆澳門立法會選舉為例，話上屆有超過廿七萬名登記選民，超過十五萬人投票，投票率為五成半。直選廿張名單中有十張提出雙普選訴求，呢十張名單得票率加起嚟佔總票數三成，即有近四萬五千票，最終就有三張雙普選名單勝出，共取得四席。而今屆登記選民有三十萬人，若投票率升至六成，咁就會有十八萬名選民投票，比上屆多近三萬人。
稱做好協調 可取八席
佢又話因應澳門「反高官離保法案」效應，多咗市民支持雙普選，再加上如果有上屆選舉原本唔支持雙普選嘅選民轉軚，支持雙普選嘅選民就有望增至八、九萬人。若一張名單可以攞到一萬票，咁名單排名第一嘅候選人應該可以穩奪一席，取八席就並非不可能。佢仲呼籲澳門「支持雙普選的朋友」事先做好協調，再派出八張名單參選。
其實，呢個澳門版雷動計劃係基於多項假設，加上澳門政團眾多，要協調並非易事。就連香港各黨派都唔聽佢支笛，仲想干預澳門選舉，佢簡直係妙想天開喇！