中環出更：兩家遊台宋振菲任俊彥誤租情侶酒店
去旅行最好玩嘅地方就係永遠都會遇到啲你估唔到嘅事，早前卓妮喺一個活動上見到樂善堂常務總理宋振菲（Sophia）及任俊彥兩個好老友，原來佢哋經常兩家人一齊去旅行，啱啱先去完台灣返嚟嘅佢哋仲有搞笑經歷，兩家人連埋小朋友誤租咗間貌似情侶酒店嘅住宿，好在Sophia夠精靈，即刻就帶大家去番一間正常嘅酒店。
話說任俊彥同Sophia兩家人早前剛去完台灣旅行，由於佢哋兩家人都有小朋友，為咗出入方便就租埋車，個司機仲幫佢哋搵好晒酒店，本來佢哋上網睇啲酒店相嘅時候都覺得幾四正，點知去到先發現，無論燈光、格局、擺設都完全係情侶酒店咁款，對於兩家大細嚟講就梗係唔適合啦。任俊彥仲笑言，佢同啲小朋友解釋間酒店唔係幾乾淨，所以要轉第間，點知啲小朋友仲話「邊度唔乾淨，等我上去睇吓」，真係啼笑皆非。好在本身係IT精英嘅Sophia三兩下手勢就搵到第間酒店，連任俊彥都讚不消兩個鐘頭就將兩家人由「地獄」帶返去「天堂」。
呢日係樂善堂就職典禮，新一屆主席郭予宏上任擔大旗，前主席施家殷則按傳統留喺堂內擔任司庫一職協助傳承，仲多咗唔少新常務總理，好似溫文蕙及李燕萍咁。
郭予宏話未上任已經忙
講起旅行，好多主席喺上場前都會先去一轉旅行，因為一做主席一定忙到冇時停，但郭予宏及太太就話，上任前一年已經開始忙，淨係年頭開始計，已經有四次去旅行的計劃被迫告吹，包括去歐洲、日本及台灣，不過佢同太太都認為做善事更緊要，做咗主席之後將會主力推動扶貧、關注兒童及青少年精神健康等七大範疇的服務，一樣咁充實啫！
卓妮