政情：冇時間放狗 鄭松泰畀老婆鬧
立法會新丁議員鄭松泰除咗做議員之外，平時仲要返理工大學教書，時間自然唔夠用。佢同太太領養咗兩隻體形頗大嘅狗，其中一隻仲養咗十幾年，未做議員前大概一星期放一次狗，但依家就忙到冇時間放狗，自爆仲因為咁而被老婆話過佢添！
狗仔唔散步 會搞破壞
鄭松泰仲話，如果唔同狗仔出去散步嘅話，佢哋會喺屋企搞破壞。雖然香港畀狗仔散步嘅地方有限，不過鄭松泰話好彩佢屋企接近著名嘅狗公園沙田彭福公園，有時仲會去下城門河附近，所以都唔怕冇地方去。
近年多咗人養寵物，市民嘅公德心都提高咗，放狗時都會處理好狗隻嘅大小二便。鄭松泰都好認同，話養狗人士唔係大家想像中咁污糟，希望政府可以從教育入手，令一般市民唔好咁反感喎！