政情：李寧：爭勝機會或得一次 做運動員難過做生意
有「體操王子」之稱嘅前國家運動員李寧轉型從商多年，日前佢出席一個教育中心舉辦嘅講座時話，做生意一啲都唔容易，佢就經常面對困難同煩惱，例如推出新產品驚賣唔出，到賣得出又驚賺唔夠成本，如果唔推出新產品又無法應付市場競爭，有時真係煩到睡不安寢。
但係相較之下，做生意都係冇做運動員咁難。事關運動員嘅爭勝機會可能只係得一次，就算全力以赴都未必凱旋而歸。但係做生意如果今日賺唔到錢，聽日都可以再賺過喎！
體操生涯經驗助解難
李寧又話，運動員嘅生涯經驗有助佢應付商業世界中各種困難同挫折，諗番當初創業時曾面對無錢嘅問題，依家回頭望，錢銀已經唔係問題。不過人嘅能力始終有限，若果面對難關，不如試下睇開啲，將目標稍為調整，譬如攞唔到第一，咪攞住第二先囉！