中環出更：吳永嘉抽籤食足11次白果
立法會大會其中一項議程，係透過議員提出無法律約束力嘅議員議案，辯論引起社會大眾關注嘅議題，但提出議案前須抽籤，抽中咗先有得提出。我哋早前講過，今屆現存六十八名議員之中，民主黨（白鴿黨）鄺俊宇（Roy）、尹兆堅（肥尹）及資訊科技界莫乃光（Charles）抽足十二次籤都落空。但原來建制派都有人食白果，就係抽咗十一次籤都唔中嘅工業界吳永嘉，其次係商界林健鋒，抽咗九次依然落空。
5白鴿至今未提過議案
立法會秘書處前日公布，截至前日中午，提出議員議案抽籤失利最多嘅係阿Roy、肥尹同Charles，三人抽咗十二次都全部落空。阿Roy、肥尹嘅黨友涂謹申同胡志偉就緊隨其後，失利次數多達十一次。值得一提嘅係，雖然該黨黃碧雲抽中咗，但係正式提出嘅日子要視乎立法會審議《撥款條例草案》嘅進度。換言之，該黨七名議員之中，有五人仍未提出過議員議案，即係今屆上任咁耐都係食白果。
卓妮