中環出更：宣揚孝道無分中西 名人諗計冧掂媽媽
今日就係母親節，好多城中名人都有慶祝節目。早前卓妮喺香港林氏總商會成立晚會上見到唔少名人，包括向來積極宣揚儒家思想同埋中國文化嘅孔教學院院長湯恩佳，佢話今年唔會慶祝母親節，唔通佢只重視中國嘅節日，唔過西方節日？湯恩佳就笑笑口話，只係工作忙碌加上子女唔係全部喺香港，所以今年先會無暇慶祝啫！
湯恩佳話，母親節雖然由西方傳入，但佢都認同可以藉此宣揚孝心。不過中國都有唔少故事能夠歌頌母親，好似「孟母三遷」等，所以建議社會多啲借助中國傳統故事去教導各種美德，仲可以壯大中國嘅軟實力添！
陳恒鑌話煮胡椒豬肚
同場仲有立法會議員陳恒鑌同柯創盛（柯仔），作為潮州人嘅陳恒鑌話打算落廚煮胡椒豬肚湯等家鄉菜，以慰勞母親嘅辛勞。佢話自細已經入廚房幫手，所以對自己廚藝頗有信心喎！柯仔就自爆被媽媽投訴只能喺電視上見到佢，所以佢好識做，一早已送上一大束康乃馨。柯仔更話，以往經常兩母子返鄉下玩，旅程好溫馨，期望立法會會期結束後可以抽時間同媽媽再去喇！
講番總商會成立，當日係林氏宗親天下，除咗創會會長林世強、執行副會長林曼霞之外，仲有一班姓林嘅潮州商會年輕人撐場，有專業調解員資格嘅林曼霞話，有關知識能有助解決家庭問題，所以家人相處融洽，不過未來要兼顧會務，就要學識分配時間咁話喇。
卓妮