政情：李慧琼記錯民記人數 黨友偷笑

講少二萬人 靠別人提醒

話說李慧琼提起民記嘅歷史時，講到佢哋最初由五十六名創黨成員，發展至現時一萬四千人，眾人即刻提醒佢，現時嘅會員人數係三萬四千人，佢亦即時道歉，更正為三萬四千人，而喺佢身旁嘅副主席陳勇同陳克勤見證蝦碌事件，亦不禁偷笑。

李慧琼又重申，會努力爭取派人出選九龍西補選，而新界東補選則要視乎大局發展，若整個建制陣營認為民記合適，佢哋就會做好準備。佢承認民記已推薦人才做下屆政府嘅問責官員，但唔透露有幾多人，又提到佢哋早前舉行集思會，其中一個方向係未來除咗培育參政議政人才，亦會培育管治人才、助選人才同意見領袖。