政情：再接「唐」手 蘇國生入考評局
香港考試及評核局秘書長唐創時今年九月離任，考評局尋日公布，聘任浸會大學教務長蘇國生為新任考評局秘書長，將於九月一日履新。仲記得唐創時當年上任考評局秘書長前，亦係出任浸大教務長，當年唐創時轉職考評局，就由蘇國生接任其於浸大嘅原有工作，而蘇國生今次落實過檔考評局，將會係第二度接替唐創時嘞。
接替唐創時秘書長職務
考評局主席陳仲尼讚揚蘇國生喺課程發展、教育行政同公開考試管理方面具出色嘅領導能力，深信喺蘇國生領導下，考評局定能面對未來嘅種種挑戰，繼續提供專業嘅服務配合社會對學習同進修嘅需求。此外，陳仲尼亦感謝唐創時過去六年盡心領導考評局。
蘇國生對獲聘任感欣喜，表明好期待同考評局委員會、教育界以及各持份者一同努力，為香港提供卓越專業嘅考評服務。資料顯示，蘇國生曾於考評局唔同事務委員會擔任職務，包括公開考試委員會及公開考試水平委員會委員，目前係上訴覆核委員會成員。