政情:王桂壎表明心迹唔做司長

下屆政府問責班底仍在籌組當中,早排流傳唔少律政司司長嘅人選。其中一個係新上任嘅通訊事務管理局主席王桂壎,尋日佢出席香港律師會傳媒聚會時就表明心迹,話自己好鍾意呢項公職,仲講到明唔會做司長。

王桂壎話唔知點解會被提名,估計可能係因為喺法律界資歷深啲,甚至做過律師會會長,所以每次特首籌組班底時總會被提名。

指有人提名已夠開心

佢仲講笑,話好似做奧斯卡金像獎候選人咁,唔同嘅係有人提名佢就好開心。又透露,冇人正式接觸佢,自己亦都冇同候任特首林鄭月娥會面。

香港律師會上星期去咗北京,同內地司法系統部門及港澳辦會面,會長蘇紹聰亦透露,話有同當局傾過關於釋法嘅問題,認為過去全國人大常委會主動釋法嘅過程比較倉促,希望可增加釋法嘅透明度,甚至日後再有釋法時,人大常委會可以考慮港人嘅意見。

蘇紹聰又話尊重人大常委會有釋法嘅權利,但認為如非必要都盡量唔好釋法,因為容易令人覺得影響「一國兩制」、普通法獨立運作嘅印象。

第一手消息請下載on.cc東網iPhone/iPad/Android/Windows Phone Apps