政情：白鴿黨終抽到六四辯論 要過拉布關
最近三年因為立法會拉布，泛民都提唔到「平反六四」議案，民主黨（白鴿黨）全數七名議員早前採用大包圍策略，一齊入紙抽籤提六四議案，但一直都冇消息。立法會秘書處尋日就為佢哋送上「遲來的春天」，白鴿黨議員黃碧雲終於「開齋」抽中籤，最快兩個禮拜後就可以提出六四議案，但六四之前得番四次會期，排喺議程前仲有一大堆預算案修正項目同埋另外兩個議員議案，有冇得如期提議案，好視乎主席幾時剪布。
尚有預算案及兩議案未討論
立法會秘書處尋日向議員預告，大會最快喺今個月十七號辯論由黃碧雲提出「毋忘六四，平反八九民運」嘅議案。不過，但要趕及六四前辯論議案其實仲有暗湧，雖然主席梁君彥一早講明，只會預留六十個鐘審議預算案，但激進派就繼續拉布，加埋大會仲要先處理由議員郭家麒提出嘅「促請下任行政長官重啟政改」，以及毛孟靜嘅「改善本港的英語教育質素」議案，一旦主席剪布唔夠「快、狠、準」，議案分分鐘要拖到六四之後先有得傾，到時就真係凍過水喇！
其實喺過去嘅六四前夕，民主派議員，特別係白鴿黨，都會爭取提出六四議案，但近年就因為受民主派自己拉布所累，議案多數拖到過晒期都辯論唔到。事隔三年，難得再有機會提出議案，恐怕白鴿黨個個都望天打卦，望主席快啲剪布，費事激進派阻頭阻勢。