政情：建制泛民飯局煲無米粥

今次午宴係兩、三個月前，由民建聯主席李慧琼提出，建制派召集人廖長江做東，出席者除咗上述二人外，建制派議員有陳克勤、黃國健、葉劉淑儀、林健鋒、鍾國斌，而民主派議員就有民主黨（白鴿黨）主席胡志偉、公民黨（公文袋）黨魁楊岳橋同黨友郭榮鏗，但並冇自決同激進派。

齊討論打破與內地隔膜

多名與會者喺午宴後都坦言，今次大家各自表述，冇達成任何共識。但據悉，有泛民在飯局中提出與內地官員唔熟悉，舉例指上次政改問題到深圳亦係臨急臨忙，又唔熟悉該等官員，點去傾呢？有建制派則指上次泛民到上海見到內地官員都傾唔到喇，反問有乜嘢建議去處理？於是有泛民就提出係咪可以有啲技術嘅做法，唔好咁政治性，例如好似早前立法會考察東江水咁。

胡志偉喺會後形容今次係各自表述，交換政策取態，以及就點樣解開唔同黨派與內地政府之間關係嘅隔膜，探討唔同做法，互相講各自觀點，以立法會考察東江水作例子，未來或考慮由事務委員會提出課題，互相溝通交流。楊岳橋就認為今次係互相聆聽，並非要說服或被說服，「冇咁多深層次含意」。

建制方面，廖長江話各人就教育、土地房屋、環保等交流意見，但未有達成任何共識，會面氣氛融洽，暫時未有計劃安排下次會面。李慧琼就話各人就點樣使用下屆政府增撥教育嘅資源，以及樓價過高嘅問題，各自表達意見。

吳得掂亂入做路人甲

正當入面煲緊冇米粥嘅時候，場外就發生一段教育局局長吳克儉（吳得掂）「亂入」嘅小插曲。事關佢喺同一時段一度出現喺同一間餐廳樓下，因而被追問係咪出席建制同泛民午宴同埋點睇BCA開考，但佢全部都冇回應。據知，佢並無出席建制同泛民嘅午宴，只係路人甲！