中環出更：鄭松泰議辦開幕 「塗」惹是非
立法會議員鄭松泰位於青衣長亨邨嘅議員辦事處本周初先開幕，點知未夠一星期即招惹是非！鄭松泰指房屋署（房署）人員拖延佢繪畫壁畫嘅申請近兩個月，至壁畫畫成之後先話要剷走，係政治打壓。不過，房署就反駁，話只係出租辦事處室內空間，外牆無租出，唔可以繪畫壁畫。
外牆繪畫壁畫 房署要求剷走
鄭松泰話知悉成功申請長亨邨嘅議員辦事處之後，已經向房署同物業管理公司申請，要求喺辦事處嘅外牆上畫上壁畫，不過未獲回覆；佢之後就因為辦事處趕住開幕而展開工程，壁畫完成之後物業管理公司職員先話要剷走。佢大呻安排唔合理，話上一個租用辦事處嘅議員，都喺同一位置張貼海報同報告版，覺得唔畀佢畫畫係政治打壓。
但房署發言人指出，物業管理公司職員於收到申請後曾經聯絡辦事處職員，表明唔可以喺單位外牆畫上壁畫，但未獲理會。發言人又強調房委會只將單位嘅室內租畀承租人，唔包括外牆；而根據大廈公契，任何人都唔可以改變屋邨內任何建築物嘅外觀，包括油漆或顏色。
卓妮