中環出更：學唱粵劇李鋈麟廁所練高音
喺學習音樂嘅過程中，能夠有幸獲大師指導，往往帶嚟唔少啟發。但天分嘅嘢因人而異，把聲一向沙沙哋嘅東華三院主席李鋈麟就自言唔係呢瓣，仲話三歲時學唱粵劇，最叻就喺廁所練高音，不過唱多幾唱把聲就已經沙晒。
香港北京交流協進會（協進會）尋日喺東華旗下學校舉辦「中國三大男高音音樂會——莫華倫大師分享會」，請咗國際著名男高音及香港歌劇院藝術總監莫華倫即席為學生指導分享。
莫華倫傳授學生歌唱秘笈
卓妮一去到就見到李鋈麟坐咗喺接待處，唔通佢負責做埋職員接待來賓？身旁嘅東華三院執行總監蘇祐安就笑笑口話佢都係職員嚟！但李鋈麟唔係叫來賓簽名，而係簽緊自己個名，事關佢每日都有大量文件要簽，忙到連出席活動前都爭取時間繼續簽。
出席活動嘅學生分別來自東華旗下十八間學校，莫華倫聽完學生現場表演之後，更即席畀建議同傳授秘笈。佢透露，原來家族有四代人都曾經係東華董事局成員，佢就喺北京出世，似乎同兩個機構都甚有淵源。
講起唱歌，協進會會長施榮懷難忘九三年幫歡樂滿東華籌款時用女聲唱《帝女花》，仲堅持係唱live唔係上台咪嘴，同年莫華倫仲喺該籌款節目度表演唱爆杯，印象深刻。轉頭見到副主席文穎怡同馬清揚，馬清揚話自己都鍾意唱歌，但唔係唱歌劇同粵劇，而係唱K，後生嗰陣最密一星期唱一次，不過依家就冇啦！
卓妮