中環出更：唔怕DQ鄭松泰再有議辦開張
多名非建制派立法會議員正遭到司法覆核，面臨被取消議席（DQ）嘅危機。但議員鄭松泰卻一於少理，繼開設元朗地區辦事處外，位於青衣長亨邨嘅辦事處亦喺尋日開張。鄭松泰話未來亦會專注地區事務，考慮再增設辦事處，亦唔怕因為喺立法會會議廳倒插國旗一事而被取消議席嘅危機，而嘥晒啲錢。
鄭松泰早前向房屋署申請辦事處，當時意外地得知自己同公民黨（公文袋）嘅立法會議員郭家麒進行抽籤。原來事件仲有後續，鄭松泰尋日透露，指郭家麒因自己本身喺葵青區有辦事處，再加上抽到屯門區嘅辦事處，因此決定放棄，故鄭松泰唔使抽籤就可以青衣開辦事處嘞！
將麥美娟果籃分畀街坊
地辦開幕，立法會議員麥美娟與葵青區議員張慧晶分別送上果籃同花籃，但鄭松泰就將佢哋送嚟嘅禮物分開兩邊擺放，笑言佢哋「走埋一齊會鬧交」。佢仲話自己唔能夠收麥美娟送贈嘅果籃，仲即場將果籃嘅水果派畀街坊添！除咗麥美娟嘅水果之外，鄭松泰仲大搞新意思，將用作聘請舞獅嘅費用買多一隻燒豬同其他食品，話要與民同樂喎。
卓妮