熱血公民立法會議員鄭松泰前日喺立法會內務委員會動議，要求運用《立法會（權力及特權）條例》（特權法）成立專責委員會調查選舉事務處電腦失竊事件，但因為贊成同反對各有廿五票，最終由內會主席李慧琼按《議事規則》投反對票否決動議。其實民主派就事件多次炮轟政府，甚至有議員直指要削減選舉事務處相關官員人工，但民主派竟然有三位議員缺席特權法投票，結果被網民批鬥。
缺席投票議員包括民主黨涂謹申同許智峯、以及公民黨楊岳橋，竟然喺投票時唔見影，搞到被網民批鬥，仲揶揄佢哋「關鍵一席，開會缺席」。
其實鄭松泰嘅議案只係以內會名義喺立法會大會上提出動議，運用特權法調查事件。即使議案在內會獲得通過，亦要由李慧琼喺大會上提出相關動議並表決通過，先可以用特權法成立專委會去調查事件。
再者，即使議案在內會被否決，鄭松泰仍可於大會上再提出相關動議，故前日內會有冇通過鄭松泰嘅動議，與能否成立專責委員會調查事件的關係不大。
不過，有關投票亦反映議員或政黨對議題嘅立場同姿態，民主黨同公民黨之前就電腦失竊事件批評得聲嘶力竭，唔齊人投票實在講唔過去。