政情：羅致光盛傳做局長 李華明疑行會招手 諗計凍黨籍為入熱廚房
候任特首林鄭月娥話上任後首要工作係要修補社會撕裂，仲話希望可以邀請唔同派別嘅人才加入政府，又呼籲各黨派唔好咁快落閘禁止黨員加入政府，似係針對表明冇普選之前，唔准黨員做官及出任行政會議成員嘅民主黨（白鴿黨）。有白鴿黨「大腦」之稱嘅老鴿羅致光早已被盛傳係下屆局長人選，近日又有傳聞另一老鴿李華明（肥仔明）獲邀加入行會。不過，傳聞兩隻老鴿都唔想退黨，仲研究緊能否凍結黨籍添。
林鄭當選後，政圈一直盛傳身兼政府扶貧委員會成員及關愛基金專責小組主席嘅羅致光，係下屆政府勞工及福利局局長人選，但羅致光喺商界同社會福利界之間，可以話係兩面不討好。事關商界擔心羅致光掌管勞福局會過於福利主義，而社福界就早已因為佢擔任社福界立法會議員時，支持林鄭月娥推行嘅「一筆過撥款」而存有牙齒印。因此羅致光加入政府都分分鐘要轉換跑道，改為接替前黨友、現任運輸及房屋局局長張炳良，又或者重操喺白鴿黨研究環保政策嘅「故業」，掌管環境局。
除咗政治問責官員，有傳新一屆行會亦會有民主派人士加入，其中一個就係肥仔明。肥仔明唔止熟悉食物安全及衞生範疇政策，可以畀到意見政府，卸任立法會議員後仲自立門戶做政治公關，擅長溝通，同政商界都有偈傾。不過，亦都正正因為佢開公關公司，一旦入咗行會，利益申報方面真係要好小心處理。
民主黨禁黨員加入政府
無論羅致光加入政府定肥仔明入行會，都要先過白鴿黨嗰關，事關該黨主席胡志偉已多次表明未有普選前，黨員唔可以加入政府同行會，而呢個講法其實只係緣於當年中委針對現屆特首梁振英政府而作出嘅一個決定。如要推翻決定難免會被外界質疑「打倒昨日的我」，所以，兩人只有退黨同凍結黨籍兩個選擇。不過，兩人喺白鴿黨都咁多年，要佢哋退黨都幾不近人情，相信好大機會凍結黨籍就過關。