中環出更：陳光明開羅考察 百年飯店朝聖
好多人去旅行都會揀當地嘅著名景點，實地了解當地歷史同文化。早前卓妮喺潮州商會青年委員會一個聯歡晚宴上見到該會名譽參事陳光明，佢就啱啱去完埃及考察返港，講起埃及首都開羅有間百年飯店Mena House，係上世紀「開羅會議」舉行嘅地方，幾有歷史意義不在話下，食飯便宜之餘竟然仲冇乜客人，佢去到變相好似包場咁，唔識貨嘅人真係走寶喇！
以前讀過歷史嘅陳光明話，世界有幾個地方特別吸引佢，一世人點都要去一次。佢好多年前去過伊朗及印度泰姬陵，而今次難得去到開羅，除咗睇金字塔，仲去咗有過百年歷史、二次大戰時多國元首舉行開羅會議嘅Mena House食飯，參觀當時的英國首相邱吉爾住過嘅房間。
陳光明話，雖然飯店已有一定歷史，住嘅話未必適合，但親身去睇到咁有歷史價值的相片及擺設，加埋一望出窗外就係對正兩個金字塔的莊觀景色，美景加美食先係幾百元，直呼好抵，下次去開羅都要喺嗰度食飯咁話。
當晚一班潮青搵埋廣東社團及中華總商會嘅青委一齊聯歡，潮青委員李嘉莉都在場，佢都啱啱去完不丹旅行，難忘行山行咗三個幾鐘頭，又指當地交通警好似跳舞咁指揮交通，路上有唔少標語提示駕駛者屋企有家人等緊佢哋，要安全駕駛，睇到即會心微笑。
林宣亮用潮劇推潮州文化
出席嘅仲有潮青名譽參事林宣亮及葉振南、主任章曼琪、副主任龔雅璇及委員黃進達等。林宣亮話，早前得知《紅樓夢》喺三藩市歌劇院都有公演，認為除咗粵劇及京劇之外，大家都應該認識吓「潮劇」，所以正準備嚟緊會整番套潮劇畀大家睇，兼推廣吓潮州文化。
卓妮