話畀狗咬 一腳踢開
立法會內務委員會尋日討論係咪引用特權法，調查選舉事務處遺失兩部手提電腦一事，長毛於發言時突然離晒題自爆，稱狗見到主人時會搖頭擺尾，有一次自己踢波踢到波褲爛咗，換咗其他人嘅波褲，回到屋企後，家中嘅狗就因為聞到其他人嘅味道即刻咬咗佢一啖，佢登時踢開隻狗。
長毛有關言論一出，會議室內其他議員即時嘩然，大鬧長毛虐畜，但長毛反駁稱，「如果你畀狗咬唔踢開，我話你叻」，其實講完一大輪，長毛係想表達支持以特權法調查選舉處「失腦」事件。
至於長毛何以忽發奇想以狗隻作比喻，其實係因為會計界議員梁繼昌提到立法會有「watchdog（監察者）」角色，估唔到講講吓，就引申到狗隻嘅習性。