政情：任期尾聲 黃錦星急清11日半假
現屆政府任期去到六月底，港府高官最近都輪流清假，事關無論係咪過渡至新一屆政府，未放嘅假期都會自動消失，最新清假係去留機會一半半嘅環境局局長黃錦星，佢於尋日下午開始休假至下月九日，前後放假十一日半，呢段時間會由環境局副局長陸恭蕙署任。
高永文亦休假7日
黃錦星最近先代表政府宣布，已經同兩間電力公司簽訂新《管制計劃協議》，將准許回報率下調至百分之八，今次明顯係搞埋兩電新協議呢件大事，等待一切塵埃落定，先安心去休假充電。
至於有傳離開政府心意已決嘅食物及衞生局局長高永文，同樣於尋日開始休假並離港，直至下月四日為止，據聞高永文今次休假係去日本，期間由食衞局副局長陳肇始署任。
其實政圈一早盛傳高永文於離任後，預料會重開診所繼續執業，加上今次前後放假七日，正所謂「空穴來風，未必無因」，睇怕高永文於七一後很大機會有一番新發展。