政情：肥彭 黃之鋒 李漢奸赴美唱衰中港
今年七一係香港回歸二十周年，又係外國勢力同反中亂港分子，合奏唱衰中港嘅好時機。佔領行動核心搞手、香港眾志秘書長黃之鋒尋日主動通知傳媒，預告佢將於下月三日，即下周三聯同末代港督彭定康（肥彭）及外號「李漢奸」嘅民主黨創黨主席李柱銘，一同遠赴美國首都華盛頓，出席美國國會就香港回歸二十周年所舉行嘅聽證會。
翻查美國國會網頁，聽證會嘅命題為「香港模式能否存活？主權移交二十年總評」，其引言提到北京近年加緊干預香港、又發生銅鑼灣書店事件、特首普選仍未落實，對自由、法治、人權及高度自由嘅威脅日益嚴峻等，由此觀之，好明顯係未討論已有結論，再加上「兩老一嫩」三大反中亂港頭領同場現身說法，肯定會唱到中港兩地有咁衰、得咁衰！
其實「兩老一嫩」三大反中亂港頭領，近年時常獲邀到外國「唱衰香港」，當中肥彭同黃之鋒早於兩個半月前「合體」，當時肥彭於老家英國會見到訪嘅黃之鋒，據報原本二人原定會面十分鐘，最後傾咗成粒鐘，似乎二人臭味相投，「唱衰香港」一唱一和到欲罷不能。
隨時又遭冷待自取其辱
黃之鋒事後引述肥彭稱支持佔領行動，反對兩年前政改方案，並形容中國政府對普選有另類定義等，顯然肥彭雖冇「回魂」返香港，一有機會就喺度搞搞震。
至於李漢奸呢個到外國「唱衰香港」常客，過去多數聯同「民主阿婆」前政務司司長陳方安生成行，但呢兩個舊電池嘅影響力直插谷底，多次到外國均被人冷待及食檸檬。
眾所周知，今年係香港回歸二十周年大日子，七一前後當然唔可以出亂子，內地護法、親中陣營嘅重炮手一早虛位以待，駁斥各方在明在暗「唱衰香港」嘅言行，今次肥彭、黃之鋒同李漢奸高調地一同到美國合奏「唱衰香港」，肯定會唱到中港兩地有咁衰、得咁衰，最終實際效果會否「唱衰」失敗，反而自取其辱，於當地畀人冷待或遭到炮轟亂噏廿四，最後要無癮離開，數日後自有分曉。