中環出更：學習感恩 楊大偉正能量爆燈
俗語都有話「一樣米養百樣人」，因生活環境、經歷嘅唔同，每個人嘅性格、思想等亦截然不同，社企Green Monday創辦人楊大偉（David）認為，學習感恩能夠令人變得正能量，因為樂天並非天生；同場嘅教育局局長政治助理施俊輝（Jeff）亦認同感恩嘅重要性，直言自己時常心存滿足，希望為一歲嘅囡囡樹立榜樣。
品格教育協會尋日為「香港品格日」舉行感恩禮，以答謝有份響應嘅團體，協會主席劉馬露明，獲得丈夫劉仲恒、父親馬時亨到場支持，而David、Jeff、民政事務局副局長許曉暉等都有現身。
眾所周知，每個人嘅心態會影響對事物嘅睇法，David認為，負能量可以透過改變諗法去調節，就好似耳熟能詳嘅「半杯水」故事一樣，只要轉換角度就有截然不同嘅心態；佢其後更指，其實無論好事壞事都要心存感恩，因為挫折能令人成長，難怪佢會視創業失敗嘅經歷為最好嘅歷練。
加入官場前曾任生命教育科老師嘅Jeff同樣認同感恩重要，佢憶述當年有份教導學生品格，唔少學生認為學科成績唔影響升學而有所忽略，不過，隨着社會風氣已變，Jeff相信品格教育會愈嚟愈受港人重視。
劉仲恒夫婦教囝囝分享
同場嘅劉馬露明及劉仲恒講起十個月大嘅囝囝，向來注重品格教育嘅佢哋透露，已經向囝囝教授咩叫分享，又表明拒做怪獸家長，而且已打算任由囝囝撞板，因為想畀佢有更多探索同嘗試，以便學習書本以外嘅知識。
卓妮