中環出更：鄧宣宏雁帶團遊麗江 眾人嗌Encore
城中名人經常世界各地周圍去，愛沙尼亞共和國駐港名譽領事林建康及太太林黃寧艷、林太家姐劉黃寧達（Leta）等一班好友，早前就搞搞新意思，拉隊到太子珠寶鐘錶副主席鄧宣宏雁（Emily）嘅家鄉雲南玩。Emily透露自己首次做團長，原來壓力都唔細，因為要安排十幾位團員食好、住好，對於眾人意猶未盡話下次仲要去玩，Emily都話兩年後先講喇！
今次雲南之旅嘅團員包括Emily老公鄧鉅明、Leta嘅律師老公劉守良，仲有專程由英國返嚟嘅Leta大家姐Linda及丈夫Simon等人。一場嚟到，又點少得去體驗麗江古城嘅日夜美色、昆明石林嘅奇峰異石，仲有被稱為「神山」嘅玉龍雪山靚景。
鄧鉅明盛讚當地酒店靚景
Emily話，玉龍雪山位於海拔三、四千公尺高，事先大家已經買定氧氣以備不時之需，隨着海拔愈嚟愈高，佢都覺得心跳加速、呼吸困難，笑稱自己來港十五年，估唔到連高山環境都唔適應！鄧鉅明都玩得好盡興，猛讚當地酒店入邊有湖泊及中式園林「好得」，仲話下次要去香格里拉玩添！
Leta就對雲南米線及農家菜讚不絕口，直言平時返內地多數去上海、北京，未去過麗江，估唔到當地咁靚。今次Leta三姐妹難得把臂同遊，特別開心，不過大家各有各忙，好似細妹林黃寧艷趕返香港後，即帶囝囝、奶奶去英國度假，不過喺英國定居嘅大家姐難得到內地玩，就同老公留低玩多兩日嘞！
卓妮